N. Vanlaiphai Damdawi Veng Branch Tlawh Report
Ni 23. 10. ‘11 (Zirtawpni) zing dar 6:30 khan Kohhran zaipawl member 61 leh KTP a Kohhran Committee aiawh Upa C.H. Thangkhuma te chu Biak In bul atangin N. Vanlaiphai Damdawi Veng Branch KTP tlawh turin phur takin Bus pahnihin kan chhuak a. Inhmuahna hlimawm leh dangdai N. Vanlaiphai khaw luh hma, Chhura Farep bulah police te’n min lo tiding a, bus atanga min chhuktirin bus chhung an check nghal zung zung a. thenkhatin KTP programme-a kal te min lo check chiam chu tul an tih loh thu an phun pui, thenkhatin drama leh film vela police lem ang an ti. An duhtawka bus an check hnuah Police rual chu Damdawi Veng Branch KTP hruaitute an ni tih kan hre ve ta hlawm a.
An la duhtawk mai lo, Upa C.H.Thangkhuma chuanna atan liau liau JCB thar an lo chhawp, a hmaah
thuttirin hma an hruai a, tlai dar 4:00 velah min lo hmuahna Pastor Quarters chu Pathian hruainain dam takin kan thleng ta a ni. Ni 24. 9. ‘11 (Inrinni) chhunah Branch pahnihten football leh volley- ball hmangin intihhlimna hun kan hmang a. Hlim takin nilengin hun kan hmang ho a, nuam kan ti tlang hle.
Zirtawpni zan, Inrinni zan, Pathianni chawhnu leh zanah te Pathian biak inkhawm neih thin a ni. Inrinni zan leh Pathianni zan inkhawm banah Lersia Hall-ah fellowship programme hman thin a ni a, Branch pahnih te inbuatsaihna a tha bawk a, mit leh beng a tlait hin hle. Pathianni chawhnu inkhawm banah sightseeing neiin Lungkawlh tlangah kan kal a, he tlang atang hian Tan tlang, tiau lui, Lungreng puk, Burma ram, Liandova te khua leh a chhehvel khaw thenkhat a lang thei a ni.
Damdawi Veng Kohhran mipui an lo inbuatsaih nasa a, thlen in ten min duat thiamin an bula awm a nuam hle a. Innel leh inngaina taka hun kan hmanho hnuin ni 26, Sept. (Thawhtanni) zingah N.Vanlaiphai rawn chhuahsanin Pathian hruainain tlai dar 3 velah kan veng kan rawn thleng a ni.
